अनन्त शान्तिको लागी

यो शान्तिको युग हो 
कृपया
मृत्युको खेलमा मलाइ नहुत्याइयोस

यसको अर्थ
मैले नक्कली बौद्धमार्गीको गूम्वा खोजेको होइन
जहाँ भिक्षुको भेषमा वारुद भण्डारन गरिएको होस
मैले परेवा उडाउने अधिकार खोजेको होइन
जसको मनमा हिटलर जन्मेको होस

मैले खोजेको
ती मान्छेहरुलाइ छुन हो
जो मलाइ अछुत भन्छन्
त्यस्तो जीवनको बिरोध हो
जो हामीलाइ आँशुको उपाहार दिन्छन्

तर तिमीले भिष्मप्रतिज्ञा झैं
ऐलान ग¥यौ असत्यको

‘मेरो युग वन्दूकको युग हो
या त तिमी मेरो मोजलको अगाडी शान्तिसंग वस
या त मेरो वन्दुक खोस’

मैले तिम्रो वन्दुकको शान्ति भंग गर्न
मृत्युको खेल खेलेको सत्य हो
यो युगको शान्ति ल्याउन
वन्दुक थन्क्याएर चुपचाप वसेकोपनि सत्य हो
भन, तिम्रो सत्य कुन हो
मेरो सत्य यहि हो ।

कृपया मलाइ शान्ति चाहिएको छ
त्यो युगको होइन यो युगको
जहाँ न्यायको आभाष छरिएको होस
परिवर्तनको लहर फैलिएको होस
आत्मसम्मान
स्वाभिमान
समानता
र नौलो विहानीमा नवीन पवन वगेको होस ।

यसको लागी फेरि मलाइ
मृत्युको खेलमा नहुत्याइयोस
कृपया मलाइ
अनन्त अनन्त शान्ति चाहिएको छ ।
२०६७ पौष २३